Rais wa FIFA, Gianni Infantino, anakabiliwa na shinikizo kubwa la kisiasa ndani ya soka la dunia kufuatia kushindwa kwa mpango wake wa kuanzisha kampuni ya kibiashara ambayo ingeuza sehemu ya hisa za mashindano ya FIFA kwa wawekezaji binafsi.
Mpango huo ulizua upinzani mkubwa kutoka kwa mashirikisho mbalimbali ya soka duniani, huku UEFA ikiongoza upinzani huo kwa kutishia kususia mashindano yote ya FIFA, ikiwemo Kombe la Dunia, endapo pendekezo hilo lisingeondolewa.
Baada ya FIFA kuamua kuufuta rasmi mpango huo, UEFA ilitoa taarifa ikisema imepoteza imani na uongozi wa Infantino, hatua iliyoongeza shinikizo kwa rais huyo ambaye hadi wiki moja iliyopita alionekana kuwa katika nafasi imara ya kuendelea kuiongoza FIFA.
Mbali na UEFA, Shirikisho la Soka la Amerika Kaskazini, Kati na Caribbean (CONCACAF) pia limetaka kufanyika kwa uchunguzi wa kina kuhusu uongozi wa FIFA. Hata baadhi ya wanachama wa Shirikisho la Soka Asia (AFC), ambao awali walikuwa wakimuunga mkono Infantino, wameanza kujitenga naye.
Shinikizo hilo limeongezeka zaidi baada ya wasaidizi wake wa karibu, akiwemo mshauri mwandamizi Carlos Cordeiro na Ofisa Mkuu wa Uendeshaji wa FIFA Kevin Lamour, kuondoka katika nafasi zao.
Anaweza kuondolewa vipi?
Njia ya haraka zaidi kwa Infantino kuondoka madarakani ni kujiuzulu mwenyewe, kama alivyofanya mtangulizi wake, Sepp Blatter, mwaka 2015.
Iwapo hatajiuzulu, Baraza la FIFA linaweza kuitisha kikao cha dharura ikiwa angalau wajumbe 19 kati ya 37 wataunga mkono hatua hiyo. Kikao hicho kinaweza kumtaka Infantino ajiuzulu, ingawa kisheria anaweza kukataa kufanya hivyo.
Hatua nyingine ni kuitishwa kwa Mkutano Mkuu Maalum wa FIFA ikiwa angalau mashirikisho wanachama 43 yatawasilisha ombi rasmi. Katika mkutano huo, kura ya kutokuwa na imani na rais itahitaji kuungwa mkono na angalau wanachama 106 kati ya 211 ili ipitishwe.
Hata hivyo, kufikia idadi hiyo si jambo rahisi, kwani baadhi ya mashirikisho makubwa, ikiwemo yale ya Afrika, Amerika Kusini na Oceania, hayajatoa upinzani wa wazi dhidi ya Infantino.
Nani anaweza kumrithi?
Iwapo uchaguzi mpya utahitajika, jina linalotajwa kupewa nafasi kubwa ni Rais wa CONCACAF, Victor Montagliani, ambaye ana uzoefu mkubwa wa uongozi wa soka na alishiriki kwa karibu maandalizi ya Kombe la Dunia 2026.
Jina lingine ni Rais wa AFC, Sheikh Salman bin Ebrahim Al Khalifa, ambaye ameonyesha kutoridhishwa na namna FIFA ilivyosimamia mpango huo.
Pia kumekuwa na tetesi kuhusu Nasser Al-Khelaifi, ingawa taarifa zinaonyesha hana nia ya kuwania urais wa FIFA kwa sasa.
Licha ya msukosuko huo, Infantino bado anaungwa mkono na baadhi ya nchi wanachama, zikiwemo Qatar, Morocco na Misri. Hivyo, hatima yake itategemea uwezo wake wa kurejesha imani ya mashirikisho wanachama kabla ya uchaguzi wa urais wa FIFA unaotarajiwa kufanyika mwezi Machi mwakani.
Wachambuzi wa soka wanaamini miezi michache ijayo itakuwa muhimu katika kuamua iwapo Infantino ataendelea kuiongoza FIFA au atalazimika kuondoka kutokana na shinikizo linaloendelea kuongezeka.
