Kinda wa kimataifa wa Senegal, Ibrahim Mbaye, ameondoka rasmi Paris Saint-Germain (PSG) na kujiunga na Aston Villa ya England kwa uhamisho wa kudumu wenye thamani ya takribani euro milioni 55.
Mbaye, mwenye umri wa miaka 18, amefunga ukurasa wa miaka minane akiwa ndani ya mfumo wa PSG, baada ya kujiunga na akademia ya klabu hiyo akiwa na umri wa miaka 10.
Mshambuliaji huyo aliweka historia mwaka 2024 baada ya kuwa mchezaji mwenye umri mdogo zaidi kuanza mchezo wa Ligue 1 akiwa na miaka 16, miezi sita na siku 23.
Katika kipindi chake PSG, Mbaye alifanikiwa kutwaa mataji makubwa nane, yakiwemo mawili ya UEFA Champions League pamoja na mataji mawili ya Ligue 1.
Kabla ya Aston Villa kukamilisha usajili wake, Mbaye alikuwa akifuatiliwa na baadhi ya klabu kubwa barani Ulaya, huku Liverpool ikiwa miongoni mwa timu zilizokuwa zikihitaji huduma yake.
Hata hivyo, Aston Villa ilifanikiwa kushinda mbio hizo na sasa kinda huyo wa Senegal ameanza sura mpya ya maisha yake ya soka nchini England.
Mbaye anatarajiwa kufanya kazi chini ya kocha Unai Emery, huku Aston Villa ikimtarajia kuwa sehemu muhimu ya mipango ya muda mrefu ya klabu katika kujenga kikosi chenye ushindani.
Uhamisho huo wa thamani ya takribani euro milioni 55 unaonyesha imani ambayo Aston Villa imeweka kwa kipaji cha Mbaye, ambaye sasa atakuwa na nafasi ya kuendelea kukuza uwezo wake katika soka la England.
