Ubelgiji imefanikiwa kusonga hatua ya 16 bora ya Kombe la Dunia 2026 baada ya kuibuka na ushindi wa mabao 3-2 dhidi ya Senegal katika mchezo wa kusisimua uliokwenda hadi muda wa nyongeza mjini Seattle.
Senegal walianza mchezo kwa kasi na kuonekana kudhibiti kabisa mchezo huo, wakipata mabao mawili kupitia Habib Diarra na Ismaïla Sarr, hali iliyowaweka katika nafasi nzuri ya kusonga mbele.
Katika kipindi kikubwa cha mchezo, Senegal waliendelea kuonyesha ubora wao, wakitengeneza nafasi kadhaa za kuongeza mabao huku Ubelgiji wakipata wakati mgumu kuutafuta mlango wa wapinzani wao.
Hata hivyo, mambo yalibadilika dakika za mwisho baada ya Romelu Lukaku kufunga bao muhimu lililopunguza tofauti ya mabao na kuamsha matumaini ya Ubelgiji.
Dakika chache baadaye, Youri Tielemans alisawazisha kwa kichwa, akiipatia Ubelgiji bao la pili na kulazimisha mchezo kwenda muda wa nyongeza (extra time).
Katika dakika ya 125 ya mchezo, Ubelgiji ilipata penati baada ya VAR kuonyesha rafu iliyofanywa na Lamine Camara ndani ya eneo la hatari. Tielemans alichukua jukumu hilo na kufunga kwa ustadi mkubwa, akipachika mpira kona ya juu na kuipa Ubelgiji ushindi wa 3-2.
Ushindi huo unaifanya Ubelgiji kusonga hatua ya 16 bora ambapo sasa itakutana na mshindi kati ya Marekani na Bosnia na Herzegovina katika mchezo unaofuata.
Kwa upande wa Senegal, matokeo haya ni ya maumivu makubwa baada ya kuongoza kwa muda mrefu na kucheza soka la kiwango cha juu, lakini kushindwa kuhimili presha ya dakika za mwisho kumeigharimu timu hiyo nafasi ya kusonga mbele.
