Morocco ipo nafasi ya pili Kundi C la Kombe la Dunia 2026 baada ya kuibuka na ushindi mwembamba wa mabao 1-0 dhidi ya Scotland katika mchezo uliopigwa Foxborough, huku nyota wake Ismael Saibari akiandika historia kwa kufunga bao la mapema zaidi kwenye mashindano hayo.
Saibari aliifungia Morocco bao pekee la mchezo sekunde 71 tu baada ya filimbi ya kuanza kupulizwa, akimalizia pasi maridadi kutoka kwa Brahim Diaz na kuipa timu yake uongozi wa mapema ambao uliamua matokeo ya mchezo.
Baada ya bao hilo, Morocco iliendelea kutengeneza nafasi kadhaa za kuongeza mabao kupitia Saibari, Azzedine Ounahi na Bilal El-Khannouss, lakini ilishindwa kuzitumia ipasavyo.
Scotland walijaribu kusaka bao la kusawazisha katika dakika za mwisho za mchezo kupitia Scott McTominay na John McGinn, lakini uimara wa safu ya ulinzi ya Morocco pamoja na kipa Yassine Bounou ulihakikisha Atlas Lions wanaondoka na pointi zote tatu.
Ushindi huo unaifanya Morocco kufikisha pointi nne baada ya kutoka sare dhidi ya Brazil katika mchezo wa kwanza wa kundi hilo, na sasa inaongoza Kundi C kuelekea mechi yake ya mwisho dhidi ya Haiti Juni 25.
Morocco imeonyesha uwezo wa kushambulia na pia kulinda matokeo, jambo linalowapa matumaini makubwa ya kufuzu hatua ya mtoano ya Kombe la Dunia 2026.
