Quibdó, Colombia — Mwanamuziki maarufu wa Colombia, Shakira Mebarak Ripoll, ameahidi kushiriki katika juhudi za kurejesha miundombinu ya elimu iliyoharibiwa na tetemeko la ardhi lililoikumba nchi hiyo, likiwemo kujenga upya shule 10 pamoja na kurejesha Chuo Kikuu cha Teknolojia katika eneo la Chocó.
Ahadi hiyo imetolewa baada ya Shakira kutembelea Quibdó, Chocó, ambako alitembelea baadhi ya shule zilizoharibiwa, huku akikutana na wanafunzi, walimu na jamii zilizoathiriwa na janga hilo.
Kupitia taasisi yake ya Fundación Pies Descalzos, Shakira amesema atashirikiana na Howard G. Buffett Foundation katika juhudi za kurejesha elimu katika maeneo yaliyoathirika.
Katika mpango huo, jumla ya dola milioni 1.25 za Marekani zimetangazwa kwa ajili ya kusaidia kurejesha sekta ya elimu. Kati ya fedha hizo, dola 500,000 zitatolewa na FIFA Global Citizen Education Fund, nyingine dola 500,000 kutoka Live Nation, huku CAF Development Bank ikitoa dola 250,000.
Shakira amesema moja ya mambo yanayompa wasiwasi mkubwa ni uwezekano wa shule kutorejeshwa baada ya kipindi cha dharura kumalizika, jambo ambalo linaweza kuwaathiri zaidi watoto katika maeneo yaliyokumbwa na maafa.
Amesisitiza umuhimu wa kuhakikisha watoto wanarejea shuleni haraka na kuendelea na masomo yao licha ya changamoto zilizosababishwa na tetemeko hilo.
Hatua hiyo inaongeza juhudi za msanii huyo katika kutumia taasisi yake kusaidia kuboresha fursa za elimu kwa watoto na jamii zinazokabiliwa na mazingira magumu nchini Colombia.
Kwa Shakira, kurejesha shule si suala la kujenga majengo pekee, bali ni kurejesha matumaini na kuhakikisha watoto hawawezi kupoteza haki yao ya kupata elimu kutokana na janga la asili.
