Mshambuliaji wa timu ya taifa ya Argentina, Paulo Dybala, ameongeza mkataba wake na klabu ya AS Roma utakaomuweka katika kikosi hicho cha Serie A hadi Juni 2027.
Roma ilithibitisha taarifa hiyo Jumatatu, ikimaliza uvumi uliokuwa ukihusishwa na mustakabali wa nyota huyo mwenye umri wa miaka 32.
Dybala alijiunga na Roma mwaka 2022 baada ya kuitumikia Juventus kwa miaka saba, na tangu wakati huo amekuwa mmoja wa wachezaji muhimu wa klabu hiyo. Katika kipindi chake akiwa Roma, amecheza mechi 139 na kufunga mabao 45 katika mashindano yote.
Pia aliisaidia Roma kutinga fainali ya UEFA Europa League katika msimu wake wa kwanza akiwa na klabu hiyo.
Hata hivyo, msimu uliopita Dybala alikumbwa na majeraha yaliyomuweka nje ya uwanja kwa muda mrefu. Alifanyiwa upasuaji wa goti mwezi Machi na kukosa kucheza kwa karibu miezi minne, hali iliyozua maswali kuhusu hatma yake ndani ya Roma.
Licha ya changamoto hizo, Roma imeamua kuendelea na nyota huyo baada ya kumaliza nafasi ya tatu katika msimamo wa Serie A msimu uliopita na kufuzu kushiriki Ligi ya Mabingwa Ulaya (UEFA Champions League) kwa mara ya kwanza tangu msimu wa 2018/19.
Roma itaanza kampeni yake ya Serie A msimu mpya kwa mchezo wa nyumbani dhidi ya Fiorentina utakaochezwa Agosti 24.
