Paraguay imeandika historia kwa kuiondosha Ujerumani kwenye Kombe la Dunia 2026 baada ya kushinda kwa mabao 4-3 kwa mikwaju ya penalti kufuatia sare ya 1-1 ndani ya dakika 120 katika mchezo wa hatua ya 32 bora uliochezwa Foxborough, Marekani.
Matokeo hayo yameifanya Ujerumani kupoteza kwa mara ya kwanza kabisa katika mikwaju ya penalti kwenye historia yake ya Kombe la Dunia, huku pia ikishuhudia safari yake ikimalizika mapema kwa mara nyingine tangu ilipotwaa ubingwa wa dunia mwaka 2014.
Paraguay ndiyo iliyokuwa ya kwanza kupata bao kupitia Julio Enciso aliyefunga kwa kichwa kabla ya mapumziko, akitumia vizuri krosi ya Matias Galarza baada ya safu ya ulinzi ya Ujerumani kushindwa kuondoa hatari.
Kipindi cha pili, Ujerumani ilisawazisha kupitia Kai Havertz aliyefunga bao lake la tatu katika mashindano hayo kwa kichwa baada ya kupokea krosi nzuri kutoka kwa Florian Wirtz.
Dakika za nyongeza zilishuhudia Jonathan Tah akiifungia Ujerumani bao lililodhaniwa kuwa la ushindi, lakini mwamuzi alilifuta baada ya mapitio ya VAR kubaini kuwa Waldemar Anton alimfanyia faulo kipa wa Paraguay, Orlando Gill, kabla ya bao hilo kufungwa.
Katika mikwaju ya penalti, Orlando Gill aliibuka shujaa kwa kuokoa penalti za Kai Havertz na Nick Woltemade. Ingawa Paraguay ilipoteza nafasi mbili za kumaliza mchezo mapema, Jose Canale alifunga penalti ya ushindi baada ya Jonathan Tah kupiga mpira wake juu ya lango.
Ushindi huo ni miongoni mwa mafanikio makubwa zaidi katika historia ya Paraguay kwenye Kombe la Dunia. Sasa timu hiyo inasubiri mshindi wa mchezo kati ya Ufaransa na Uswidi katika hatua inayofuata.
Kwa upande wa Ujerumani, matokeo hayo yanaongeza presha kwa kocha Julian Nagelsmann baada ya timu hiyo kushindwa kufika mbali katika mashindano makubwa kwa mara nyingine, licha ya kuonyesha kiwango kizuri katika hatua ya makundi.
