USIKU wa deni haukawii kukucha, ndivyo unavyoweza
kusema kwani hatimaye kivumbi cha mashindano ya
kimataifa yaani Ligi ya Mabingwa Afrika na Kombe la
Shirikisho Afrika kimeanza kutimua vumbi rasmi Ijumaa na kinatarajiwa kuendelea wikiendi hii.
Kwa upande wa Tanzania Bara msimu huu tunatarajiwa
kushirikisha timu nne katika mashindano hayo, ambapo
timu za Yanga na Simba zinatarajiwa kutuwakilisha katika
mashindano ya Ligi ya Mabingwa Afrika, huku Azam FC
na Singida Fountain Gate zikituwakilisha kwenye Kombe
la Shirikisho.
Kwa upande wa Ligi ya Mabingwa Afrika, Simba wao
wana faida ya kuanzia hatua ya kwanza, hivyo ni watani
zao wa jadi Yanga ambao wataanzia hatua hii ya awali
ambapo karata yao ya kwanza itakuwa kuvaana na AS Ali
Sabieh Djibouti Télécom (ASAS), ya Djibout ambapo
mchezo wa mkondo wa kwanza utapigwa leo Jumapili
kwenye Uwanja wa Azam Complex, Chamazi.
Hapa tunakuletea dondoo muhimu za
mchezo huu kama ifuatavyo,
Ugenini kama nyumbani, nyumbani ni nyumbani tu
Kama ambavyo ilikuwa msimu uliopita dhidi ya Zalan, Yanga msimu huu pia wamepata mteremko wa michezo
yao yote miwili ya hatua ya awali kupigwa kwenye ardhi
ya Tanzania kutokana na maombi ya Zalan ambao
wameomba kutumia Uwanja wa Azam Complex, kama
Uwanja wao wa nyumbani.
Kwa wapenzi wa ngumi hii inaweza kuwakumbusha ule
usemi wa bondia maarufu, Karim Mandonga ambaye
aliwahi kusema yeye akipigwa kama amepiga, na akipiga
ndo amepiga. Hivyo kwa Yanga ugenini kama nyumbani,
na nyumbani ni nyumbani tu.
Nani kuvunja rekodi ya Mayele?
Msimu uliopita kwenye kikosi cha Yanga bao la kwanza kwenye mashindano ya kimataifa lilifungwa na aliyekuwa
straika wao mkongomani, Fiston Kalala Mayele akitumia asisti matata ya Denis Nkane dakika ya 45 ya mchezo ambao ulimalizika kwa Yanga kuibuka na ushindi wa mabao 4-0 huku Mayele akifunga Hat-trick.
Kwa sasa Mayele hayuko ndani ya kikosi cha Yanga baada ya kukamilisha uhamisho wa kujiunga na Pyramid FC ya
Misri. Ukiachana na straika Mzambia, Kennedy Musonda
Yanga imesajili straika mpya, Hafiz Konkon na swali kubwa ni je, nani atavunja rekodi ya Mayele? Ikumbukwe, Mayele pia msimu uliopita alimaliza akiwa mfungaji bora wa Kombe la Shirikisho Afrika akiweka kambani mabao saba na kumzidi Ranga Chivaviro.
Licha ya kwamba wamekuwa na rekodi mbovu ya zaidi ya
miaka 20 kushindwa kufuzu hatua ya makundi ya Ligi ya
Mabingwa Afrika lakini katika mizania Yanga
wanaonekana kuwa kwenye faida kubwa ya rekodi nzuri
za ushiriki wao kimataifa kulinganisha na wapinzani wao.
Mafanikio makubwa ya Yanga katika mashindano ya
kimataifa ni kuibuka washindi wa pili wa Kombe la
Shirikisho Afrika, rekodi ambayo wamefanikiwa kuipata
msimu uliopita ambapo waliukosa ubingwa wa
mashindano hayo kutokana na faida ya kanuni ya bao la
ugenini.
Kwa upande wa ASAS ambao licha ya kwamba hakuna
taarifa nyingi kuwahusu kwenye mtandao lakini ni inaonekana hawana rekodi yoyote ya kuweza kucheza hatua ya makundi ya mashindano ya kimataifa japo kwa nyakati kadhaa wamefanikiwa kutawala soka la ndani na
kushinda ubingwa wa Ligi Kuu.
Yanga wanasemaje?
Kuelekea mchezo huo dhidi ya ASAS, Ofisa habari wa Yanga, Ali Kamwe: “Nadhani mchezo huu utakuwa
mgumu zaidi kwetu kulinganisha na michezo ya Ngao ya
Jamii kwa kuwa hatuna taarifa nyingi kuwahusu
wapinzani wetu.
“Tutahitaji kuwajibika zaidi kwenye mchezo huu na
kusahau kuhusu Ngao ya Jamii ili kutimiza malengo ya
kufuzu hatua inayofuata.”
