TIMU ya taifa ya Tanzania ‘Taifa Stars’ itashuka dimbani leo Novemba 16, 2024 kwenye mchezo wa kuwania kufuzu kombe la Mataifa Afrika AFCON 2025 dhidi ya Ethiopia katika uwanja wa Taifa wa Jamhuri ya Kidemokrasia ya Congo, (Martyrs de la Pentecote) ikihitaji kufufua matumaini yake ya kukata tiketi ya AFCON 2025.
Wenyeji, Ethiopia ambao wamechagua uwanja wa Martyrs de la Pentecote kuwa uwanja wao wa nyumbani wapo mkiani mwa msimamo wa kundi H pointi 1 baada ya mechi nne huku Stars ambayo inahitaji kusahau vipigo viwili mfululizo dhidi ya DR Congo kwenye mechi mbili zilizopita ikishika nafasi ya tatu alama nne baada ya mechi 4.
Ethiopia inaingia kwenye mchezo huo ikiwa na rekodi mbaya ya kushindwa kupata ushindi kwenye mechi 9 zilizopita za kiushindani, sare 4 na vipigo vitano ingawa wana rekodi nzuri dhidi ya Tanzania.
Ethiopia haijawahi kupoteza mechi yoyote dhidi ya Tanzania wakishinda mara mbili na kutoka sare mbili kwenye mechi nne walizowahi kukutana.
Ili kuweka hai matumaini ya kufuzu, Tanzania leo wanahitaji kuvunja mwiko huo na kushinda kwa mara ya kwanza dhidi ya Ethiopia huku ikiiombea dua mbaya Guinea ambao watachuana na DR Congo.
19:00 Ethiopia 🇪🇹 vs 🇹🇿 Tanzania
22:00 Guinea 🇬🇳 vs 🇨🇩 DR Congo
