Shirikisho la Soka Barani Afrika (CAF) limetangaza rasmi kufuta Michuano ya Mataifa ya Afrika kwa Wachezaji wa Ndani (CHAN), hatua inayokuja kufuatia changamoto mbalimbali zilizojitokeza katika maandalizi ya mashindano hayo. Tangazo hilo limetolewa na Rais wa CAF, Dkt. Patrice Motsepe, wakati wa mkutano na waandishi wa habari uliofanyika Morocco Jumamosi, Januari 17.
Akizungumza mbele ya vyombo vya habari, Dkt. Motsepe amesema uamuzi wa kufuta CHAN umefikiwa baada ya tathmini ya kina, akibainisha kuwa mashindano hayo yamekuwa yakikabiliwa na matatizo ya mara kwa mara ambayo yamefanya yasiweze kuendeshwa kwa ufanisi unaotarajiwa. Ameeleza kuwa CAF haiwezi kuendelea na mashindano ambayo hayakidhi viwango vya ushindani na maandalizi ya kitaalamu.
Rais huyo wa CAF ameongeza kuwa kalenda ya soka barani Afrika itafanyiwa mabadiliko makubwa, ambapo mashindano mapya yanatarajiwa kuanzishwa ili kuchukua nafasi ya CHAN. Kwa mujibu wa Motsepe, mabadiliko hayo yanalenga kuimarisha ubora wa mashindano ya CAF na kutoa fursa bora zaidi kwa maendeleo ya soka la Afrika.
Aidha, Dkt. Motsepe amesisitiza umuhimu wa CAF kuwa na uhuru katika kufanya maamuzi yake, huku akieleza kuwa ushirikiano na mashirika ya soka duniani utaendelea kwa misingi ya kuheshimiana na maslahi ya maendeleo ya soka barani Afrika. Uamuzi wa kufuta CHAN unatarajiwa kuzua mjadala mpana miongoni mwa wadau wa soka, hasa kuhusu mustakabali wa wachezaji wa ligi za ndani.
