SAO PAULO, Brazil – Klabu ya Santos FC ya Brazil imemteua Neymar Sr., baba mzazi na wakala wa mshambuliaji nyota Neymar Jr., kuwa Mkurugenzi Mtendaji (CEO) wa klabu hiyo.
Uteuzi huo umetangazwa Novemba 7, huku Neymar Sr. akitarajiwa kutumia uzoefu wake katika masuala ya biashara na usimamizi wa soka kuisaidia Santos kuboresha uendeshaji wake.
Neymar Sr. amekuwa na nafasi muhimu katika kusimamia maisha ya soka ya mwanaye na ndiye mwanzilishi wa kampuni ya NR Sports, inayomiliki haki za jina na picha za Neymar Jr., anayeichezea Santos.
Kwa mujibu wa taarifa za vyombo vya habari vya Brazil, mkataba wake katika nafasi hiyo unaishia Desemba mwaka huu, lakini anaweza kuendelea na wadhifa huo iwapo rais wa klabu hiyo, Marcelo Teixeira, atachaguliwa tena katika uchaguzi unaotarajiwa kufanyika mwezi ujao.
Akizungumza kuhusu uteuzi huo, Teixeira alisema klabu imekuwa ikifanya kazi kila siku kutafuta suluhisho na njia mbadala za kuboresha hali ya Santos na kuimarisha usimamizi wake.
Alisema ujio wa Neymar Sr. kama Mkurugenzi Mtendaji ni hatua nyingine muhimu katika juhudi za kujenga klabu imara zaidi, akieleza imani yake katika uzoefu na uelewa wake.
Kwa sasa, Santos inashika nafasi ya tisa katika msimamo wa Ligi Kuu ya Brazil (Serie A), ikiwa na pointi 47 baada ya kucheza mechi 34.
Neymar Jr., ambaye ni mfungaji bora wa muda wote wa timu ya taifa ya Brazil akiwa na mabao 80 katika mechi 130, alirejea Santos mwaka 2025 baada ya kucheza katika klabu kubwa za Ulaya, zikiwemo Barcelona na Paris Saint-Germain.
Uteuzi wa Neymar Sr. unatajwa kuwa hatua muhimu katika mustakabali wa Santos, hasa kutokana na nafasi yake katika maisha ya soka na biashara ya mwanaye.
