SUPER Jack Grealish alianza kupeleka furaha kwa Manchester City kwenye mchezo wa Dabi lakini meza ilivyopinduliwa hakuamini.
Baada ya dakika 90 kukamilika ubao wa Uwanja wa Old Trafford umesoma Manchester United 2-1 City.
Ni dakika ya 60 bao la kwanza lilifungwa na Jack Grealish huku bao la United likifungwa na Bruno Fernades dakika ya 78.
Bao la Bruno ambaye amechaguliwa kuwa mchezaji bora wa mchezo lilionekana kuwa ni mtego wa kuotea baada ya mwamuzi wa pembeni kuligomea kisha wachezaji wa United walionekana kumlalamikia mwamuzi wa kati.
Baada ya majadiliano kwa muda mfupi mwamuzi wa kati aliamua ngoma ipelekwe kati na ikawa ni bao la kuweka usawa kwa United.
Iliwachukua dakika nne United kupachika bao la pili kupitia kwa Marcus Rashford ambaye alipachika bao hilo dakika ya 82.
Wakati anaingia nyota wa United Harry Maguire mashabiki walionekana kushangilia kwa nguvu huku wengine wakishika vichwa.
Sasa United inafikisha pointi 38 ikiwa nafasi ya tatu huku City nafasi ya pili pointi 39 vinara ni Arsenal.
