Klabu ya soka ya Al Hilal Omdurman imeandika historia mpya katika soka la Afrika baada ya kutwaa ubingwa wa Ligi Kuu ya Rwanda msimu huu, licha ya kucheza uhamishoni kutokana na vita vinavyoendelea nchini Sudan.
Miamba hiyo ya Sudan ilimaliza msimu kwa kiwango cha juu baada ya kukusanya pointi 70 katika michezo 30, wakifunga mabao 69 huku wakiruhusu mabao 20 pekee. Mafanikio hayo yameonyesha uimara mkubwa wa kikosi hicho ndani na nje ya uwanja.
Ushindi huo umeifanya Al Hilal kuwa klabu ya kwanza barani Afrika kushinda mataji ya ligi kuu katika nchi tatu tofauti — Sudan, Mauritania na sasa Rwanda. Hatua hiyo imeongeza heshima kubwa kwa klabu hiyo ambayo imeendelea kuwa mfano wa uthabiti licha ya changamoto kubwa zinazoikabili nchi yao.
Kutokana na hali ya usalama nchini Sudan, Al Hilal walilazimika kucheza mbali na nyumbani kwao, lakini hilo halikuwazuia kuonyesha ubora wao dhidi ya timu mbalimbali za Rwanda Premier League.
Msimu huu umeelezwa na wadau wengi wa soka kama moja ya simulizi kubwa zaidi katika historia ya soka la Afrika, huku Al Hilal wakionesha kuwa mafanikio yanawezekana hata katika mazingira magumu.
Mashabiki na viongozi wa klabu hiyo wamepongeza juhudi za wachezaji na benchi la ufundi kwa kuendelea kuiwakilisha Sudan kimataifa huku wakidumisha hadhi ya klabu hiyo katika mashindano mbalimbali ya Afrika.
Kwa mafanikio haya, Al Hilal Omdurman wameendelea kujijengea sifa kama moja ya klabu zenye historia kubwa ya mapambano, mafanikio na uthabiti katika soka la Afrika.
