KIKOSI cha Yanga kinachonolewa na Kocha Mkuu, Nasreddine Nabi leo kitakuwa na kibarua cha kusaka ushindi mbele ya Mbeya City kwenye mchezo unaotarajiwa kuwa na ushindani mkubwa.
Jana wachezaji wa Yanga ikiwa ni pamoja na Zawad Mauya, Fiston Mayele,Feisal Salum walikuwa ni miongoni mwa nyota ambao walifanya mazoezi ya mwisho kwenye Uwanja wa Sokoine Mbeya kueleka mchezo wa leo.
Pia wanatarajiwa kuweza kukabidhiwa taji lao la Ligi Kuu Bara ambalo ni la 28 kwao baada ya kuweza kuwavua ubingwa msimu huu mabingwa watetezi Simba.
Cedrick Kaze, Kocha Msaidizi wa Yanga ameweka wazi kwamba wanatambua mchezo utakuwa mgumu lakini wapo tayari kwa ajili ya kupata pointi tatu muhimu.
“Mchezo tunatambua kwamba utakuwa mgumu lakini tupo tayari kwa ajili ya ushindani na tunaamini kwamba tutapata pointi tatu kwa kuwa sherehe za ubingwa zimekwisha.
“Ambacho tunakifanya ni kuendelea kulinda rekodi yetu tusipoteza mchezo kwani wachezaji wanajua kwamba kila timu tunayokutana nayo inahitaji kutufunga,” amesema.
Kwenye msimamo Yanga ipo nafasi ya kwanza ikiwa na pointi 70 aada ya kucheza mechi 28 inakutana na Mbeya City iliyo nafasi ya 9 na pointi 35.
Yanga imetoka kuwashushia kichapo cha mabao 2-0 Polisi Tanzania kwenye mchezo wao uliochezwa Uwanja wa Mkapa.
