Timu ya Taifa ya Tanzania, Taifa Stars, imeendelea kukosa ushindi katika michezo ya kuwania kufuzu Fainali za Kombe la Mataifa ya Afrika (AFCON) 2027 baada ya kupoteza kwa mabao 3-1 dhidi ya Nigeria, maarufu kama Super Eagles, katika mchezo wa Kundi L uliopigwa nchini Nigeria.
Nigeria ilianza kwa kasi mchezo huo na kupata bao la kuongoza dakika ya pili kupitia Alhassan Yusuf, kabla ya Taifa Stars kusawazisha dakika ya 32 kupitia Alphonce Msanga na kufanya timu hizo kwenda mapumziko zikiwa sare ya bao 1-1.
Kipindi cha pili, Super Eagles walirejea kwa nguvu na kufanikiwa kupata mabao mawili kupitia Tolu katika dakika ya 52 na 60, matokeo yaliyowapa wenyeji ushindi wa mabao 3-1.
Matokeo hayo yanaifanya Taifa Stars kuendelea kusota mkiani mwa msimamo wa Kundi L ikiwa na alama moja baada ya kucheza michezo mitatu bila kupata ushindi.
Kwa upande wa Nigeria, ushindi huo umeifanya kufikisha alama sita na kushika nafasi ya pili, nyuma ya Guinea-Bissau inayoongoza kundi hilo ikiwa na alama saba.
Madagascar inashika nafasi ya tatu ikiwa na alama moja, sawa na Tanzania, huku Taifa Stars ikiwa nafasi ya mwisho katika kundi hilo.
Taifa Stars sasa inahitaji kurejea kwa nguvu katika michezo ijayo ili kuongeza matumaini ya kufuzu AFCON 2027 na kuwania nafasi za juu katika Kundi L.
Msimamo wa Kundi L baada ya mechi tatu:
Guinea-Bissau – alama 7
Nigeria – alama 6
Madagascar – alama 1
Tanzania – alama 1
