UONGOZI wa Yanga umeweka wazi kuwa kwa sasa watapanga wao lini wafungwe ndani ya Ligi Kuu Bara kutokana na uimara walionao.
Kwenye ligi Yanga imecheza mechi 44 bila kufungwa ambapo walilazimisha sare ya kufungana bao 1-1 dhidi ya Simba ambao ni watani zao wa jadi.
Jana walipata ushindi wa bao1-0 dhidi ya KMC kwenye mchezo wa ligi uliochezwa Uwanja wa Mkapa kwa bao la Feisal Salum.
Ally Kamwe, Ofisa Habari wa Yanga amesema kuwa hawana mpango wa kupoteza mechi za ligi kwa sasa kutokana na uimara walionao.
“Tumecheza mechi nyingi tangu msimu uliopita bila kufungwa na tunazidi kuendelea kuwa imara kwenye mechi ambazo tunacheza zitafika mpaka 44, 45,47 mpaka sisi labda tuamue kwamba tutafungwa lini.
“Kikubwa ni kuona kwamba mashabiki wanapata furaha na wachezaji wanajua kwamba majukumu yao lazima yatimizwe kwa wao kupata ushindi ndani ya ligi,” amesema Kamwe.
