Shabiki maarufu wa Yanga, Carlos Leonard Mayangura, amefungiwa kwa muda wa miezi 12 kufuatia kuhusika katika tukio la uharibifu wa mali katika dimba la Uwanja wa Airtel Mtipa.
Kwa mujibu wa taarifa rasmi, shabiki huyo aliongoza kundi la mashabiki pamoja na baadhi ya maofisa wa ulinzi wa klabu kuvunja madirisha ya chumba cha kuvalia na kusababisha uharibifu wa mali za uwanja huo.
Adhabu hiyo imetolewa na Bodi ya Ligi (TPLB) kupitia Kamati ya Uendeshaji na Usimamizi wa Ligi, ambayo pia imeitoza Yanga SC faini ya shilingi milioni tano pamoja na kuagizwa kulipa gharama zote za matengenezo ya uharibifu uliofanyika.
Tukio hilo lilitokea kabla ya mchezo kati ya Singida Black Stars na Yanga, uliomalizika kwa Yanga kuibuka na ushindi wa mabao 3-0 katika uwanja huo.
Hatua hiyo inalenga kudhibiti nidhamu kwa mashabiki na kulinda miundombinu ya viwanja, huku ikionya vitendo vya vurugu katika michezo ya ligi kuu.
