Mmiliki mwenza wa klabu ya Inter Miami, David Beckham, amewasisimua mashabiki wa soka duniani baada ya kuchapisha picha zinazoonyesha maendeleo ya ujenzi wa uwanja mpya wa klabu hiyo, Miami Freedom Park.
Kupitia ukurasa wake rasmi wa Instagram, Beckham ameonesha kuridhishwa na kasi na ubora wa ujenzi wa uwanja huo, akibainisha kuwa mradi huo uko katika hatua nzuri na unatarajiwa kukamilika hivi karibuni. Uwanja huo unatarajiwa kuwa makazi mapya ya Inter Miami na kuimarisha zaidi ushindani wa klabu hiyo katika Ligi Kuu ya Marekani (MLS).
Akiambatanisha picha hizo, Beckham ameandika:
“Miami Freedom Park… coming VERY soon 🩷🏟️ quick trip to check on progress of our new home and I can’t quite believe how incredible it’s looking… had to be the first to kick a football here 😆⚽️”
Kauli hiyo imevutia hisia za mashabiki wengi, huku wengi wakieleza hamu ya kuuona uwanja huo ukianza kutumika rasmi. Beckham pia alionekana kupiga mpira katika eneo la uwanja huo, ishara ya furaha na matumaini makubwa juu ya mustakabali wa klabu hiyo.
Uwanja wa Miami Freedom Park unatarajiwa kuwa wa kisasa, wenye viwango vya juu vya kimataifa, na kutoa mazingira bora kwa wachezaji, mashabiki na shughuli mbalimbali za michezo na burudani. Kukamilika kwake kutakuwa hatua muhimu katika maendeleo ya Inter Miami tangu kuanzishwa kwake.
Hatua ya Beckham kushiriki maendeleo ya ujenzi huo hadharani inaonesha dhamira yake ya kuijenga Inter Miami kuwa klabu imara yenye miundombinu ya kisasa na ushindani wa juu katika soka la Marekani na kimataifa.
