Klabu ya Simba SC imethibitisha rasmi kumteua Steve Barker kuwa kocha mkuu mpya wa kikosi hicho, akichukua nafasi ya Meneja Dimitar Pantev ambaye ameondolewa katika majukumu yake.
Barker ni raia wa Afrika Kusini mwenye uzoefu mkubwa wa soka la Afrika, na jina lake halikuwa geni kwa mashabiki wa Simba SC. Kocha huyo aliwahi kukutana na Wekundu wa Msimbazi katika hatua ya nusu fainali ya Kombe la Shirikisho Afrika (CAF Confederation Cup) akiwa kocha mkuu wa klabu ya Stellenbosch FC ya Afrika Kusini.
Katika mchezo wa mkondo wa kwanza uliochezwa kwenye dimba la New Amaan Complex, Zanzibar, Simba SC iliibuka na ushindi wa bao 1-0 dhidi ya Stellenbosch. Mechi ya marudiano iliyopigwa nchini Afrika Kusini ilimalizika kwa sare tasa, matokeo yaliyoihakikishia Simba kufuzu hatua ya fainali.
Kwa msimu huu, Barker mwenye umri wa miaka 57, mzaliwa wa Lesotho, aliiongoza Stellenbosch katika jumla ya mechi 24 za mashindano yote. Katika mechi hizo, timu yake ilifanikiwa kushinda mara nane, kupata sare sita, huku ikipoteza mechi 10.
Kabla ya kuinoa Stellenbosch, Steve Barker amewahi kuzifundisha klabu kadhaa nchini Afrika Kusini zikiwemo Mpumalanga Black Aces, AmaZulu FC, pamoja na Chuo Kikuu cha Pretoria, jambo linaloonesha uzoefu wake mpana katika soka la ngazi ya juu.
Uteuzi wa Barker unaonekana kuwa sehemu ya mkakati mpya wa Simba SC kuimarisha benchi la ufundi na kurejesha makali ya klabu hiyo katika mashindano ya ndani na ya kimataifa.
