Kocha mashuhuri kutoka Italia, Carlo Ancelotti, ametangazwa rasmi kuwa kocha mpya wa timu ya taifa ya Brazil, maarufu kama Seleção. Akizungumza katika mkutano na waandishi wa habari uliofanyika katika makao makuu ya Shirikisho la Soka la Brazil (CBF), Ancelotti alisema anajivunia kupewa fursa ya kuiongoza timu bora zaidi duniani.
Kocha huyo mwenye umri wa miaka 65 amejiunga na Brazil baada ya kuhudumu kwa mafanikio makubwa katika klabu ya Real Madrid kwa kipindi cha miaka minne, ambako alishinda Ligi ya Mabingwa Ulaya mara tatu na taji la La Liga mara mbili. Ancelotti pia ana historia ya mafanikio na vilabu mbalimbali barani Ulaya, ikiwemo kutwaa taji la Ligi ya Mabingwa mara mbili akiwa na AC Milan, pamoja na kushinda mataji ya ligi nchini Uingereza, Ufaransa na Ujerumani akiwa na Chelsea, PSG na Bayern Munich mtawalia.
“Nina kazi kubwa mbele yangu,” alisema Ancelotti. “Nimefurahia changamoto hii kubwa. Nimekuwa na uhusiano maalum na timu hii. Tutafanya kazi kwa bidii kuifanya Brazil kuwa bingwa tena.”
Brazil, ambao wameshinda Kombe la Dunia mara tano – mara ya mwisho ikiwa mwaka 2002 – wanamtegemea Ancelotti kuwarejeshea heshima katika soka ya kimataifa. Mchezo wake wa kwanza kama kocha wa Brazil utakuwa mechi mbili za kufuzu kwa Kombe la Dunia la 2026.
